انا لست ضد الجيش ! الجيش مرمي في الصحرا بيصطاد سحالي و ثعابين و مش معانا في اللعبه أصلا !
المجلس الأعلى مهماش خيرة الجيش المصري ! المجلس العسكري هم خيارات مبارك و طنطاوي لقيادة الجيش!
احداث ماسبيرو ليست اول مرة يعتدي فيها الجيش على المتظاهرين بس أكثر مرة في وفيات!
الجيش فض اعتصام 9 مارس بالقوة !
الجيش اقر بكشوف العذريه !
الجيش أطلق الرصاص الحي و سقط ضحايا و قتلي يوم 9 ابريل عشان 8 ضباط لا هيجيبوا و لا يودوا! الجيش أدار معركة العباسية الأولى الجيش أدار معركة العباسية الثانيه! و قال ايه أهالي العباسيه بالطوب و السنج و المولوتوف!
الجيش سحل أهالي الدويقه (ماشي هم مخالفين بس اتسحلوا)
الجيش فض إعتصام أول رمضان و طارد الناس ألى داخل مسجد عمر مكرم و سحلهم داخل المسجد و هان امهات بتبكي اولادها
الجيش فض اعتصام ماسبيرو بالقوة 5 أكتوبر
الجيش اشتبك مع مظاهرة المصريين من أجل رفع التمييز ن الأقباط ماسبيرو 9 أكتوبر و سقط 27 قتيل و قرابه ال300 مصاب !
الجيش دايما بيقول الثورة المضادة و ايادي خفيه ! و مخابراتهم شكلها بتبيع طعميه بقالنا 9 شهور مش عارفين نقضي على الثورة المضادة و نسيطر على البلطجيه و نحدد الأيادي الخفيه ! ؟؟؟؟؟؟؟
لا المخابرات فاضيه تعمل لجان الكترونيه !
بفرض ان ما يدعيه الجيش من وجود قوى مخربه على غير رغبته تلعب في الشارع السيجا و الجيش غرر به و توتر ماشي صدقنا ملاحظتي كالتالي:
في احداث ماسبيرو لم يظهر من الجيش المصري النبيل اي درجه من درجات ضبط النفس ! مع انهم بقالم سنين ضبطين نفسهم على الحدود الإسرائيليه !
لم يبدو الإشتباك ان فيه اي رغبه في التهدئه و الحفاظ على الأرواح ! كانت هوجه و سلطه !
مين حاملي سنج الي دايما بيجروا يساندوا اشاوس الشرطه العسكريه و مبيتقبضش عليهم هو من امتى حمل سلاح ابيض قانوني في مصر ؟؟؟
شكلنا هنغير الرتب العسكريه إلى رداح أول و رداح تاني سادي أول سادي تاني حامل سنجه ، حامل سيف، حامل مطواه و حامل شومه.
ملحوظه بقى ! ستوب كدا عندك :
الإعتماد على البلطجيه في الإطاحه بالثورة سيجر البلاد إلى سطوة العصابات و بكرة يثبتوا الساده اللواءات جيش كانوا ام شرطه ديتها بس يوعوا لنفسهم و ينظموا تشكيلات اجراميه منظمه !
أخيرا بلاش مخاطرة بالبلد كونوا مع الثورة و بطلوا تسعوا وراء السيطرة و التحكم !
No comments:
Post a Comment
Note: Only a member of this blog may post a comment.