ليس هناك انتخابات في مصر 2011!
أنا بتكلم جد مش تهريج!
لا يا متسرع مش عشان المجلس هيلغيها !
لإنها حتى لو استمرت مصر لن تتمكن من التصويت !
ليه ؟؟ أقلك:
1- الناخب العادي الي مش بلطجي و لا جاي مع جماعته محتاج امان عشان يقدر ينزل يصوت و ينتظر في الطابور من غير ان يفزع و يضطر للرحيل حفاظا على حياته ! لو حد منكم لاقي شرطه و امن و شرطه عسكريه قادرة فعليا على حفظ الأمن يشاورلي و هم مش قادرين يا حرام يمسكوا كام عصابه بتسرق العربيات مقابل فديه! لو مفيش لجان تصويت امنه يبقى انت منتخبتش!
2-انا فدائيه و هقف مش هخاف من العنف و التحرشات الي حوليه و هثبت في الطابور و هنتظر من 4-5 ساعات و هدخل الاقي ايه بقى اني محتاجه اختار من 3 مجموعات اوراق انتخب قائمة و فردي فئات و فردي عمال من بين ييجي 200 اسم في المتوسط ! انا لو بعرف اقرا كويس هاخدلي 4-5 دقايق على الأقل لو بدور بالصورة ممكن اخدلي ربع ساعه او الحل التزويري المفضل اقول للقاضي او حد من المناديب علملي انت انا مش عارف ! يبقى انت منتخبتش!
3- المدة اللازمه للتصويت تتراوح بين 4 دقائق ل 8 دقائق انا أحب اكد لك ان دا تقدير متفائل لإن في 2010 كانت الأعداد أقل بكتيرحوالي 20 مرشح على كل مقعد ووقت التصويت كان أكتر بسبب الحوسه و اني بختار فئات و عمال و امرأه ! و دا في أفضل التقديرات و بفرض انتظام العمليه الإنتخابيه و عدم اغلاق اللجنه و احنا في يوتوبيا انتخابيه خرافيه وهميه لن يسمح لأكثر من 10% من الناخبين بالتصويت نتيجة عدد الساعات المتاحه للإقتراع. صعب تكون انتخبت!
4- شطورة انا و فركوكة و صوت و حطيت ورقتي في الصندوق قالك الصناديق لازم تتحرك تتفسح لحد لجنة الفرز وسط البلطجيه و المتطرفين و المتحمسين و معتادي التزوير! و نقعد ندعي ان الصندوق يوصل سليم و هوهو نفس الصندوق الي كان في اللجنه!
5- اليوم ممكن يعدي بمساوئه و محاسنه و انت صوت بس القضاه المشرفين الي دورهم في تزوير الإنتخابات 2005 و 2010 و الرئاسيه 2005 لا ينكره حمار من حقهم يفرزوا مع نفسهم و هم يكتبوا النتيجه مع نفسهم و اضرب راسك يا مواطن لإن الفرز مش علني و القاضي سيد قراره في لجنة الفرزسلطات ملهاش ارض و لا سقف إنه رب لجنة الفرز! و لو حضرتك مندوب نجح في دخول لجنة الفرز لو نطق مع القاضي هيتنفخ و يقوله اسكت لتتسجن!
6-النتيجة طلعت و الناس سكتت و رضيت بالنتيجه و البرلمان حلف اليمين ياخد أجازة ان شاء الله بقى لحد ما يصدر الدستور الجديد لإنه ملوش مهام من غير ما يكون في دستور ينظمها !
6-النتيجة طلعت و الناس سكتت و رضيت بالنتيجه و البرلمان حلف اليمين ياخد أجازة ان شاء الله بقى لحد ما يصدر الدستور الجديد لإنه ملوش مهام من غير ما يكون في دستور ينظمها !
7- الحمدلله صدر الدستور الجديد و أصبح المجلس غير دستوري في الأغلب لن يتوافق مع شروط الدستور الجديد و سيتم حله و انتخاب مجلس جديد!
و زغرطي يلي منتيش غرمانه !
و الي معاه قرش محيرة يدخل انتخابات و يطيره !
محدش يقلي ان ديسمبر 2011 في انتخابات ! دا فيلم كوميديا سوداء !
و يظل للمواطن الحق في اختيار البطيخه و أكل الأتا!
No comments:
Post a Comment
Note: Only a member of this blog may post a comment.